...
Ӗҫре ҫитӗнӳ пултӑр тесен ӗҫе юратса та вӑй-хала, вӑхӑта шеллемесӗр ӗҫлемелле. Пирте пуринче те ҫав тӑрӑшулӑх ҫук-ха, анчах вӑл пулмаллах. Ҫавӑн пек пулма пурнӑҫ, общество хӑй хушать.
Мӗн пӗчӗкрен хӗн-асаппа пурӑнатӑп пулсан та эпӗ ӗҫре те, пурнӑҫра та тӳрӗлӗхпе тӗрӗслӗхе тытса пынӑ. Ултавпа тӳнтерлӗхе эпӗ ачаран юратмастӑп, вӗсемпе яланах кӗрешетӗп. Ӗҫе ӗҫленӗ чух вӗҫне ҫитиччен чун-чӗререн тӑрӑшса лайӑх пахалӑхпа пултӑр тесе ҫине тӑратӑп. Пирӗн ҫемьере ӗҫрен хӑракан, унран пӑрӑнакан никам та пулман – Сатур йӑхӗ.
Кашни ҫын хӑйне хӑй чӑн тӳрӗлӗхпе те тӗрӗслӗхпе, типтерлӗхпе, ӗҫченлӗхпе, ялан ҫынна ырӑ тӑвас кӑмӑлпа пурӑнма хӑнӑхмалла. Ҫавӑн чух ҫеҫ пур енчен те тулли, ҫителӗклӗ, илемлӗ те хаваслӑ, туслӑ пурнӑҫпа пурӑнма пултаратпӑр. Унсӑрӑн мирлӗ те чӑн хаваслӑ, тулли пурнӑҫ тӑвасси ҫинчен калаҫмалли те ҫук.
Каялла мар, малалла, шав ҫутталла туртӑнмалла. Малашлӑх мӗнле тусан та лайӑх пулмаллине курма, ӑнланма пӗлмелле. Ҫавна пурнӑҫлама тӑрӑшмалла; суялӑхпа, вӑрӑ-хурахла пурӑнассине пуҫран пачах кӑларса пӑрахмалла.