Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Ăстампулта виç тинĕс,

Сапса йăлтăр хумне,

Илемлĕн, лăпкăн, тикĕс,

Кăваккăн, тĕксĕм-симес

Кăтартрĕç хăй сăнне.

Çăтмах çапла-ши тетĕп

Е тамăк çакăн пек?

Пăхатăп, тĕлĕнетĕп,

Ăшчикĕмпе телейлĕн

Савса çуйлантăм эп.

Хам ăнланман чĕлхе те,

Хам калайман сăмах

Манра çуратрĕ хевтĕ,

Раскаллă эпĕ тетĕп,

Инçет те ман çумрах!

Аэропорт - Вакиф - Полис еви.

Çут кашăк, çăмарта

Шурă чашка хутăмăр,

Ирхине тăтăмăр та —

Пушă савăт куртăмăр.

Йăлт та йăлт сикет чакак:

«Çăмарта пехлетĕп ак!»

Çутă кашăкĕ вара

Мĕншĕн кирлĕ-ши вăрра?

Çăмарта çимешкĕн-ши?

Сивĕ шыв ĕçмешкĕн-ши?

Асатте мана кĕтмен,

Асанне пĕлмен-илтмен

Çуллахи каникула

Эпĕ пырасса яла.

Асатте унта-кунта

Уткалать те чупкалать,

Çупăрлать мана чунтан

Сухалне шăла-шăла.

Васкаварлăн асанне

Пуçтарать сĕтел çине:

Ахаль мар-мĕн каçхине

Çунă кушакки питне.

Чи хисеплĕ вырăна

Кĕртсе лартрĕç те мана

Тытăнчĕç хăна тума.

Мĕн кăна хуман ума?

Йăл кулать ман асанне:

«Çи-ха, çи, — тет, — шăрттанне».

Асатте калать: «Палан

Питĕ тутлă пылпалан».

Авалхи кил-çурт шăрши

Маншăн чи тутли мар-ши?

Пурăннă тет тахçан авал пĕр ял варринче Йăмрапипе Кӳлтиер. Вĕсем патне час-часах тепĕр тусĕ Çилтеш те килсех çӳренĕ тет. Питĕ килĕштерсе пурăннă вĕсем. Кӳлтиер ир-ирех хĕвел çутипе тĕкĕрне çутатса ярать. Йăмрапийĕ вара хăйĕн çăра та вăрăм çӳçне ун çине пăхса тата çĕнĕ куншăн савăнса турама тытăнать. Çилтешĕ те аякра юлмасть вара, Йăмрапийе çӳçне турама пулăшать: малтан пĕр енне якатса вырттарать, кайран тепĕр еннелле. Хăш чухне вара ашкăнчăк Çилтешĕн выляс кăмăл çуралнă. Ун пек чух вăл Йăмрапин çӳçне енчен енне тустарнă кăна. Малтанах Йăмрапине çакăн пек алхасса выляма килĕшнĕ-ха. Анчах Çилтеш Йăмрапин çӳçĕ тăкăнма пуçласан та ыраттарнипе йынăшсан та чарăнма шутламан. Нимĕнле те ӳкĕте кĕртеймесĕр Йăмрапи вара Кӳлтиртен пулăшу ыйтать. Ватă та ăслă Кӳлтиер яланах пулăшма хатĕр пулнă. Вара вăл Çилтеше:

— Эсĕ мĕншĕн яланах, йĕркеллĕ вылянă çĕртенех, ытлашшипех ашкăнма тытăнатăн? Хăвăн юлташу кӳренме пуçланине те туймастăн-им?

— Ман тытмалла та выляс килет, Йăмрапине хампа пĕрле тĕнче курма илсе каяс килет. Мĕнле аван-çке пĕрле выляса-кулса çӳремешкĕн. Пĕччен тунсăх мана.

— Эсĕ ыйтнă-и Йăмрапирен, каяс килет-ши унăн таçта çити?

Малалла

Çеçкеленет хитре чечек

Çӳл ту хысакĕнче.

Чипер пике кулли пекех

Тӳпе ытамĕнче.

Çут уйăх каçхине ăна

Савать савни тесе.

Çут çăлтăрсем çӳлтен ăна

Пăхаççĕ куç хĕссе.

Эс мар-ши, тусăм, çав чечек?

Кĕтетĕп эп сана.

Килме пăрахрăн эс текех,

Манасшăн-шим мана.

Çанталăк шăрах. Ту çинче

Чечек типсе хăрать.

Çав чечек евĕр пĕр-пĕччен

Савни таçта ларать.

Аветик Исаакян

Çӳл тусен тăррине кунсерен çӳресе,

Эп тем чухлĕ йĕрсе йӳç куççулĕ юхтартăм.

Çӳл тусен тăрринчи çил-тăман ӳлесе,

Эрленсе йĕнине тĕнчене йăлт каларĕ.

Сĕм çĕрле, çеçенхир варринче эп пĕччен.

Эп тахçан макăрни çил пулса кунта çитрĕ.

Питĕ шел — макăрни сан патна çеç çитмен,

Сан чĕрӳ эп епле чĕннине те илтмерĕ.

Аветик Исаакян

Çĕрле. Ыйха путсассăн тинĕс

Тухать, ак, тĕлĕкре тӳрех.

Чупаççĕ хумĕсем пĕр тикĕс,

Ман сурана сиплесшĕн пек.

Таçти шур тинĕс кил пек маншăн,

Ют пек тăван çĕршыв кăна, —

Те чĕрери-чунри сураншăн,

Асра, аннеçĕм, эс кăна.

Сассу çан тинĕс шавĕ евĕр,

Ялан илтетĕп тĕлĕкре.

Тăван çĕре пырса çитмесĕр

Сипленес çук ман чун-чĕре.

Аветик Исаакян

(сăвăлла халап)

Тахçан авал çĕр çинче,

Çутă кӳлĕ хĕрринче,

Сарă кун çĕршывĕнче

Пурăннă, тет, чăвашсем,

Ырă та хастар çынсем.

Çак асамлă çĕршывра,

Пурăннă, тет, ырлăхра.

Çĕр пин чечек улăхра,

Пуян вăрман çывăхра.

Яшсемпеле арçынсем

Çилçунат пек лашипе

Ака тунă, ывăнман,

Ухатара аптраман.

Хĕрĕсем мĕн пĕчĕкрен,

Çĕр пин тĕслĕ чечекрен

Кĕпе-тумтир çĕленĕ,

Мерченпеле тĕрленĕ.

Сарă кун йĕри-тавра,

Ӳснĕ, тет, лаштра йăмра.

Хӳтлĕх панă сив çилтен,

Тĕрлĕ усал-тĕселтен.

Чăвашсем çак йывăçа,

Лартнă, тет, сума суса

Те ĕрчевлĕ пулнăран,

Те тымарĕ вăйлăран.

Çак çĕр шывăн чи асли,

Юманккапа Укаслу,

Ертсе пынă халăха,

Çирĕплетме туслăха,

Ӳстермешкĕн пурлăха.

Вĕсен хĕрĕ Хĕвелпи,

Чăннипе те чиперпи:

Çӳçĕ ылтăн ука пек,

Куçĕ сенкер тӳпе пек.

Ĕçен чăваш халăхне,

Хапсăнса ун ырлăхне,

Çичĕ тинĕс леш енчен,

Малалла

Çуллахи ир. Хĕвел тухăçĕнчен хĕвел хĕрелсе тухса пĕтĕм тĕнчене хăйĕн ăшшине, çутине сапаласа пама пуçларĕ.

— Ах, аван-çке, ырă, эпĕ ӳсетĕп, çӳлелле çĕкленетĕп, — хĕпĕртесе пăшăлтатать çамрăк йăмра хăйĕнчен инçе мар ларакан хурăна вăл кăна илтмелле.

— Çапла, паян та ырă кун пулĕ. Пире ӳсме вырăнĕ çителĕклĕ. Нӳрлĕ çĕр тымарсем тăрăх тутлă сĕткен парать. Ман çӳçе вăштăр çил сан еннелле варкăштарать. Кăмăла çĕклет лăпкă çăнталăк. Пурăнас килет, — хуравлать яштака шурă хурăн.

Йăмрапа хурăн туслашни чылай пулать. Çак таранччен вĕсем хире-хирĕç усал сăмах каламан, кӳрши ӳсекен çĕр лаптăкне хапсăнман. Усал çил кашласа килсессĕн пĕр-пĕрне тураттисемпе хупланă.

Йăмра хăйĕн вăррисене юхан шывпа юхтарать, хурăнăн вăррисене уçă çил аякка-аякка илсе каять.

Пĕррехинче чипер хĕр çунă япалисене йăмра çумĕнчи пĕвере чӳхерĕ. Хăйĕн чун савнийĕ çинчен илемлĕ юрă юрларĕ. Çавăн пек чуна тивмелли сăмахсемпе юрланине йăмрапа хурăн сывламасăр итлерĕç. Пĕр çулçи те силленмерĕ вĕсен. Кашни сăмахне ас туса юлчĕç иккĕш те.

— Сансăр пурнăç çук, савниçĕм,-